បន្ទាយមានជ័យ ៖ សមត្ថកិច្ចថៃ ឃាត់ខ្លួនពលករខ្មែរប្រុស-ស្រី ចំនួន៩នាក់ ដែលចាញ់បោកមេខ្យល់លួចឆ្លងដែនដោយខុសច្បាប់ទៅធ្វើការនៅប្រទេសថៃ នៅបរិវេណព្រៃដំឡូងមីមួយកន្លែងជាប់ព្រំដែនខេត្តស្រះកែវ។

សមត្ថកិច្ចថៃឱ្យដឹងថា ពួកគេបានឃាត់ខ្លួនពលករខ្មែរទាំង ៩នាក់ខាងលើក្នុងនោះមានស្ត្រី៤នាក់ នៅត្រង់បរិវេណព្រៃដំឡូងមីមួយកន្លែង ក្នុងស្រុកតាប្រាយ៉ា ខេត្តស្រះកែវ វេលាម៉ោង៨ និង២៤នាទី ព្រឹកថ្ងៃ១០ ខែកញ្ញានេះ។

ប្រភពដដែលបានបន្ថែមថា ពលករខ្មែរទាំង៩នាក់នោះបានប្រាប់ថា មេខ្យល់បានឱ្យពួកគេ ២នាក់ទៅធ្វើការនៅហាងលក់អាហារក្នុងក្រុងបាងកក នឹង៧នាក់ទៀតទៅធ្វើការសំណង់នៅខេត្តណៈខនប៉ះធុម ដោយពួកគេចំណាយក្នុងម្នាក់ពី ៥,០០០បាត ប្រមាណ៦២ម៉ឺនរៀល ទៅ៥,៥០០បាត ប្រមាណ៦៨ម៉ឺនទៅឱ្យមេខ្យល់។

បើតាមសមត្ថកិច្ចថៃ ក្រោយពីសួរនាំធ្វើកំណត់ហេតុ និងអនុវត្តតាមវិធានរបស់ផ្នែកសុខាភិបាលរួចមក ពលករខ្មែរទាំង៩នាក់នោះ ត្រូវបានបញ្ជូនឲ្យត្រឡប់មកប្រទេសកម្ពុជាវិញ តាមច្រកអូរបីជាន់ ក្នុងស្រុកអូជ្រៅ ខេត្តបន្ទាយមានជ័យ៕

^{PHOTO: ROEURNG CHANTREA}